MAIZPIDE izena, ondoan duen baserriaren izenetik hartu zuen Euskaltegiak, “Maizpi” baserriaren izenetik. Maiz+bide. Lazkaomendin, Lazkaoko auzoan, diren “Maiz” izeneko baserrietarako bide.
     MAIZPIDE euskaltegia Eusko Jaurlaritzaren baitako HABE erakundeak eraiki zuen, eta Euskaltegiaren kudeaketa Goierriko Euskal Eskolan urte askotan lanean jardun zuen irakasle-talde baten esku utzi.
     1988ko apirilean estreinatu edo inauguratu zen MAIZPIDE, baina historiaurrea kontuan hartu gabe ez dago MAIZPIDE ulertzerik; beraz, 60ko hamarkadara gutxienez jo behar da, Orduan agertu baitziren alfabetatzearen lehen zantzuak Lazkaoko Aita Beneditarren inguruan. Horrek, dudarik gabe, eman zuen fruitu ugari. Hala, 1975eko uztailean I. Udako Euskal Ikastaroa antolatu zen, eta 1977an Goiherriko Euskal Eskola sortu zen, Goierri osoan alfabetatze-euskalduntzea koordinatu zuen eskola. 1982ko irailean, berriz, urte osoan hasi zen antolatzen ikastaroak barnetegian. Piskanaka-piskanaka, haziz eta hedatuz joan zen, eta horrela, eta ez gauetik goizera, zerbitzuz eta baliabidez,giza baliabidez nahiz baliabide teknikoz, ondo hornitutako MAIZPIDE sortu eta eraiki zen.

     MAIZPIDE helduen euskara irakaskuntzan diharduen euskaltegia/barnetegia da. Euskaraz hitz egiten, irakurtzen eta idazten irakatsi eta euskal kultura ezagutzeko eta sakontzeko aukera eskaintzea da Maizpideren zeregina.
    MAIZPIDE euskaltegia Euskal Herriko bihotzean dago kokatua, Gipuzkoako Goierri eskualdeko Lazkao herrian, hain zuzen, Donostiatik 42 kilometrora, Baionatik 97ra, Iruñetik 65era, Gasteiztik 77ra eta Bilbotik 86ra.
     Lazkaok 5.000 biztanle inguru ditu. Lazkao herriak, nonahi, aipatu hutsarekin, asko eta askori euskaraz ikasteko gunea gogorarazten dio. Euskararen berreskuratzeko langintzan, ondo merezi izandako izen ona du Lazkaok Euskal Herri osoan eta, haratago joanda, mundu zabaleko hainbat eta hainbat bazterretan, urteetako ahaleginaren fruitu, herritarren borondate onaren eta euskaltasunaren truke, berezko nortasuna duen eta euskaraz bizitzeko irrikan dagoen herri baten ahalegina... horren guztiaren ondorio eta emaitza da MAIZPIDE euskaltegia.